Ta observa Dia Mundial di Parha Migratorio riba e di dos diasabra di mei na Merca y Canada, mientras den Caribe, Sur America, Central America y Mexico ta observa esaki riba e di dos diasabra den october.  
Cu e dianan aki kier enfoka riba e retonan cu e parhanan migratorio ta encontra, nan importancia ecologico y e necesidad di cooperacion internacional pa nan conservacion.

Tur aña, miles di parha migratorio di tur parti di mundo, ta haci e biahe largo y ta bishita Aruba pa descansa, recarga of broei prome cu nan bolbe nan pais di origen.
E aña aki, Directie Natuur en Milieu DNM, ta enfoca riba e importancia vital di insecto pa existencia di e parhanan aki despues, durante y prome cu nan biahe largo. 
Pa prome biaha un campaña ta enfoca riba e importancia di insecto, como alimentacion pa e parhanan migratorio y e menasa cu e populacion di e insectonan ta encontra. 
Insecto ta contene hopi nutriente y ta fuente di proteina pa parhanan migratorio. E presencia di insecto ta aporta na e biahe di e parhanan. Durante nan parada na diferente luga riba nan ruta, e parhanan ta busca insectonan den mondi, saliña of otro habitat. Tambe nan ta busca pa gara insectonan den aire of ta coba pa esakinan den troncon di vegetacion.

Migracion masal di parha cu ta bula distancianan largo y cubri varios continente, ta posibel cu guia di nan instintonan, señalnan medio ambiental y strategia. E migracion ta un comportacion compleho cu ta sirbi propositonan ecologico, evolucionario y di sobrevivencia. Sin insecto como fuente di alimentacion durante e buelo largo, migracion di parha ta bao menasa.

DNM den su esfuerso pa salvaguardia e fenomeno di migracion di parha, ta urgi comunidad pa tene cuenta cu e siguiente puntonan;

• Presencia di insectonan ta influencia e tempo, duracion y exito general pa e migracion di parhanan. Durante e trayecto, parhanan ta para na diferente luga riba nan ruta. Nan ta busca pa insectonan den areanan di cosecha, mondi, saliñanan, ‘wetlands’ y otro habitat.
• Parhanan cu ta come insecto ta cubri un variedad diverso di insectonan den nan dieet. Esakinan ta inclui abeha, sangura, musca, bichi, barbulet, tor y tambe invertebra acuatico manera e spirito di cabrito (tambe yama dopi dopi). P'esey no ta tur ora ta bon pa spuit cu insecticida. Parhanan cu ta come insecto ta yuda combati plaga di insecto cu por causa daño na cosecha of propaga malesa.
• 85% di mata cu ta floria ta rekeri polinisacion y esaki hopi biaha ta trabou di insectonan. P’esey si nos perde polinisantenan, nos matanan lo lucha pa produci incluyendo e parhanan cu ta depende di nan.
• Mantencion y restauracion di areanan cu tin awa manera dam, saliña y "wetlands" ta esencial pa proteccion di e grupo di parhanan acuatico cu ta come insecto.
• Observa y monitor parha migratorio uzando ciencia cu ta inclui participacion di hende ta yuda cu conscientisacion. Pa medio di campaña educacional di medio ambiente y naturalesa por duna dato importante pa restaura y maneha habitatnan
• esencial cu ta beneficia y conecta parhanan migratorio.

Ban para keto na e importancia di e diferente parhanan migratorio cu ta existi. No solamente pa admira pero pa reconoce nan importancia y nan dependencia di insecto.