ORANJESTAD - Recientemente, Minister di Labor, Energia y Integracion Glenbert Croes, a reuni cu gremionan comercial relaciona cu e escasez di trahado pa por cumpli cu e demanda laboral existente.

Mientrastanto, Departamento di Labor (DAO) y Departamento Progreso Laboral (DPL) ta den deliberacion continuo cu gremio pa yega na e miho solucion pa atende cu e preocupacion di escasez pa por cumpli cu e demanda. E aña aki tin 3000 camber di hotel adicional ta bin acerca. Segun indicacion inicial, lo ta bay tin mester di por lo menos 9000 trahado pa e hotelnan aki por opera y duna e servicio optimal cu nan ta desea.
E prioridad semper ta keda pa emplea nos localnan prome cu recluta trahado for di exterior, y data ta confirma e maneho aki: desempleo ta solamente 4.3% na 2022. Recientemente Oficina di Registro Civil (Censo), Centraal Bureau Statistiek (CBS), Banco Central Aruba (CBA) y Departamento di Labor y Investigacion (DAO) conhuntamente a haci un sondeo "Labor Force Survey" (LFS) y dentro di poco lo anuncia e tasa di desempleo pa 2023.

Ministerio di Labor tin oido pa e necesidad di gremio comercial, pero tambe ta consciente cu esnan riba 45 aña no ta hayando trabao. Varios pensionado a expresa nan deseo di por sigui traha pero no ta hayando oido di e dunadonan di trabao. 
Pronto lo bay organisa un Jobfair specialmente pa e categoria di edad aki unda tur comerciante y gremio, hunto cu DAO y DPL lo ta presente pa asisti y intermedia unda ta necesario.

Cu e incentivo aki, lo trata na yena parti di e demanda laboral y cumpli cu e preocupacion di e gremionan mientras ta cumpli cu deseo di esnan riba 45 aña y adultonan mayor, cu kier sigui contribui cu progreso di Aruba y brinda nan mes un miho calidad di bida.