Apesar di hopi reto, DIP ta trahando riba peticionnan di tereno
ORANJESTAD - Departamento di Infrastructura y Planificacion, DIP pa algun tempo ta enfrentando hopi reto cu ta afecta otorgamento di tereno.
Esaki debi na un cantidad di investigacion tumando luga den ultimo añanan pa posibel irregularidad den dicho departamento. Escasez di personal debi na schorsing pa motibo di e investigacionnan penal tambe ta contribui na e reto. Apesar di tur cos, DIP ta den proceso pa elimina e retraso y pa medio 2024 lo por nota un diferencia.
Scarsedad di tereno
Un reto cu DIP mester tene cuenta cu ne ta e preocupacion grandi na Aruba pa cu e capacidad
di carga na Aruba. Esaki combina cu scarsedad di tereno, ta haci cu DIP ta extra cauteloso y
prudente den su maneho ora ta pidi pa traha condominio of hotel. Esey den e caso especifico aki ta e causa di atraso.
Sinembargo DIP ta trahando pa cumpli cu sentencia di hues teniendo na cuenta e interes
general di pais Aruba y interes di tur esnan cu a pidi tereno. Casonan den corte tambe ta un desafio pa DIP pa purba minimalisa e retraso mas hopi posibel y pone e decision bek den man di DIP.
DIP ta trahando duro riba su eficiencia, integridad y confiansa y no ta un proceso di algun luna
pero di añanan cu tin cu drecha y ta spera mas movecion den e parti comercial den 2024 conforme ley y maneho di Pais Aruba.
